Die narrische Seitn

{MEI GEDICHT}

A richtige Diagnose

A Mann ruaft bei seim Hausarzt on

und fragt, was er wohl mochn ko,

wei sei Frau, die hod a Leidn,

sie tuat se ständig neich bekleidn.

Da Dokta moant, „des is ja schlimm,

des is a Weiberkrankheit schlechthin,

mei Oide hod des gleiche Gscherr,

dauernd muaß a neichs Gwand her.“

„Herr Dokta, sogns, wos ko i toan?

Da Kleiderschrank is long schon z’ kloan.

Um welche Krankheit tuat sichs handln

und wia wollns mei Frau behandln?“

Der Dokta denkt recht angstrengt nach,

dann klopft er sich de Hand aufs Dach:

„Iaz foid ma de Diagnose ei’–

des konn nur de Stoffwechselkrankheit sei!“

Ursula Donat, Kundin von Nah&Frisch Kauffrau

Aloisia Strumböck in Riedersbach,

5120 St. Pantaleon, OÖ

Was ist denn Stress? Sinnier i oft

und hab a viele gfragt –

a jeda stigazt ummanand

und koana hat mas gsagt.

Mir haben koa Geld und a koa Zeit

und oftmals koa Geduld –

des Oanzige, des mia habn, is Stress;

samma net selba schuld?

I hab eam a, des gib i zua –

i hab eam zwar net gern,

doch hätt i ’n net, wa i net „in“

und sicher net modern.

Wia bring i ’n weg? Wia pack i ’s an?

Des is a Zwölferfrag …

I nehm ma heut nur so viel fia,

was i leicht packa mag.

Da gspür i wia mi d’ Arbeit gfreut

vo Fruah bis in de Nacht –

kimm drauf, dass i ganz ohne Stress

viel mehr als sunst hab gmacht.

Da Stress kommt dann, wennst viel mehr willst,

als du erreichen kannst –

sei gscheit, schalt a wenig früher zruck,

bevor du di zerfranst.

Drum denkts in Ruah drüber nach,

wirds euch amoi zu bled:

Den Stress habn nur wir Menschen gmacht,

der Herrgot kennt eam net.

Rosa Dorn,

3062 Kirchstetten, NÖ